राजनीति : निर्वाचन २०७४

बागलुङको दुर्गम क्षेत्रमा १६ प्रतिशतभन्दा बढी मत बदर

पुस १, २०७४

    बागलुङ : मंसिर १० गते पहिलो चरणमा प्रतिनिधिसभा तथा प्रदेशसभा निर्वाचन भएको बागलुङको दुर्गम क्षेत्रमा १६ प्रतिशतभन्दा बढी मत बदर भएको पाइएको छ। दुर्गममा पनि प्रत्यक्षभन्दा समानुपातिकतर्फ धेरै मत बदर भएको देखिन्छ।

    जिल्लाभित्र सबैभन्दा बढी समानुपातिकतर्फ निर्वाचन क्षेत्र नम्बर-२ को प्रदेश सभा ‘ख’ मा १६.२ प्रतिशत मत बदर छ। प्रत्यक्षमा भने ५ प्रतिशत मात्र बदर छ।

    यो प्रदेशबाहेक जिल्लाको समग्र सरदर प्रत्यक्षतर्फ ३.९२ प्रतिशत र समानुपातिकतर्फ ६.२५ प्रतिशत मात्र मत बदर हुँदा क्षेत्र नम्बर-२ को ‘ख’ मा निकै धेरै मत मदर भएको हो।

    यो प्रदेशसभाभित्र बागलुङको सवैभन्दा दुर्गम ठाउँहरु पर्ने निसीखोला र तमानखोला गाउँपालिका तथा ढोरपाटन नगरपालिका पर्छन्। दुर्गम भेगका नागरिकमा साक्षरता, सचेतना र मतदाता शिक्षाको स्वाभाविक रुपमा कमी रहने र निर्वाचन आयोगले चलाएको मतदाता शिक्षा कार्यक्रमसमेत प्रभावकारी नहुँदा यस्तो अवस्था आएको हो।

    राजनीतिक दलले आफुलाई भोट मागे पनि कसरी भोट हाल्ने भन्ने विषयमा सिकाउन नसक्दा धेरै मत बदर भएको उत्तरगंमा मावि बुर्तिबाङका शिक्षक ईश्वरीप्रसाद पौडेलले जानकारी दिए।

    ‘पहिलो कुरा त यो प्रदेशमा धेरै दुर्गम र साक्षरताको कमि भएका गाउँ पर्छन्, यहाँका मतदातामा स्वभाविक रुपमा मतदाता शिक्षाको कमी नै हुनेभयो,’ पौडेलले अगाडी थपे, ‘निर्वाचन कार्यालयले चलाएको मतदाता शिक्षाको प्रभाव पनि कम देखियो, अर्कोतिर राजनीतिक पार्टी र तीनका उम्मेदवारले कसरी मत दिए सदर हुन्छ भन्ने कुरामा ध्यान दिएनन्।’

    उनले उम्मेदवार, तिनका प्रतिनिधि र दलका कार्यकर्ताले समेत आफू र आफ्नो पार्टीलाई भोट माग्दा मतदातालाई कसरी राख्दा मत सदर हुन्छ भन्ने कुरा सिकाउनुपर्नेमा जोड दिए।

    यो प्रदेशमा कुल मतदाता ३३ हजार २ सय ४० रहेको यो प्रदेशमा २१ हजार ९ सय ८३  जनाले मतदान गरेका थिए। समानुपातिकतर्फ ३ हजार ५ सय ६५ जनाले दिएको मत बदर भएको हो। प्रत्यक्षमा भने १ हजार १ सय ४० अर्थात ५ प्रतिशत मात्र मत बदर भयो।

    बागलुङका जिल्ला निर्वाचन अधिकारी विकाशचन्द्र पौडेलले मतदाता शिक्षा कार्यक्रम चलाउँदा पनि यो प्रदेशमा अरुतिरभन्दा निकै धेरै मत बदर देखिएको वताए। राजनीतिक पार्टीबीचको चुनावी तालमेल र प्रत्यक्षतर्फ उम्मेदवारी दिएका कतिपय नयाँ पार्टीको प्रदेश सभातर्फ समानुपातिकमा उम्मेदवार नहुँदा कतिपय मतदाता अन्यौलमा परेकोले धेरै मत बदर भएको उनले दाबी गरे।

कृष्ण कँडेल

 कँडेल ०७५/४/१० सम्म थाहाखबरका बागलुङ संवाददाता थिए। 

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४
९८५१०७६३३६(सञ्जय नेपाल)
इमेल: mkt.thahakhabar@gmail.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]