फिचर

मन्त्री मगरलाई छोरा खेलाउने छैन फुर्सद
SHARES

पुस १९, २०७५

    प्रकाश सिलवाल

    काठमाडौं : बालकुमारीमा स्थापना हुने फोहर पानी प्रशोधन केन्द्रको शिलान्यासको तयारीको कुरा चलिरहेको थियो। प्रधानमन्त्री केपी शर्मा ओलीबाट आज शिलान्यास हुने सो कार्यक्रमबारे बुधबार आफ्ना सचिवालयका कर्मचारीलाई निम्तोपत्र के कति पुग्यो भनेर खानेपानी तथा सरसफाइमन्त्री बीना मगरले सोध्दै गर्दा छोरा प्रणव दाहाल मन्त्रीको कुर्सी नजिकको बिजुलीको ‘प्लग’ चलाउन पुगे।

    कार्यकक्षमा रहेका एक आगन्तुकले 'मन्त्रीज्यू, बाबुलाई करेन्ट लाग्ला...' भनेपछि मन्त्री मगर छोरा समात्न पुगे। 'कति चकचक गरेको? यता आउनुस्' भन्दै मगरले प्रणवलाई बोक्न खोजे तर उनले टेरेनन्। बरु सचिवालयका एक सहयोगी महिलासँग फक्कियो। केही दिन विद्यालय बिदा भएका कारण मन्त्री मगरले सिंहदरबारस्थित मन्त्रालयमा कहिलेकाँहीसँगै लिएर जान्छिन्।

    मन्त्री मगर कुर्सी छाडेर सोफामा बसेर आगन्तुकसँग कुरा गर्दा ती चार वर्षीय छोरा खेल्दैखेल्दै मन्त्रीको टेबलमाथि चढ्न पुगे।  केहीबेरपछि कतै कार्यक्रममा बाहिर निस्कनुपर्ने जानकारी सचिवालयका कर्मचारीले दिइरहेका थिए। मन्त्री मगरले झोलाबाट छोराको स्वीटर निकालिन्। पाइन्ट छाम्दा पिसाब गरेर भिजेको देखेपछि त्यो पनि फेरिदिइन। 'ल हेर त कतिखेर सुसु गर्नुभएछ...' भन्दै छोरालाई कपडा फेर्न लाग्दा उनको कार्यकक्षमा पुगेका रासस प्रतिनिधिसँग मन्त्री मगरले भनिन्, 'आज बिदामा मन्त्रालय आएको भएर मैले एकछिन छोरा हेर्न पाएँ, घरमा हेर्न पनि भ्याइन्न । बहिनीहरुले सघाउँछन्।'

    आमाको भूमिका पूर्ण पालना गर्न नपाएको अनुभूतिसहित उनले भनिन्, 'म प्रायः बिहान चाँडै निस्कन्छु, छोरा सुतिरहेको हुन्छ। बेलुकी अबेर घरमा पुग्छु, ऊ सुतिसकेको हुन्छ।' छोराको अहिलेको हालखबर सुनाइहँदा मन्त्री मगरले एक वर्षअघि पति विगोग हुँदा र निर्वाचनमा होमिँदा आफूलाई पीडा र कठिनाइ भएको स्मरण गरिन्। 'त्यसबेला मलाई कम्ता गाह्रो भएन, छोरा अझ सानो थियो...' यति भनेर उनी रोकिइन्।

    एकछिनपछि प्रसङ्ग बदलेर मेलम्ची खानेपानी आयोजनाको कुरा गरियो। यही साता इटालियन कम्पनीसँग हुने औपचारिक वार्तापछि रोकिएको मेलम्चीको काम अघि बढ्ने उनले सुनाइन्।

    नेपाल कम्युनिष्ट पार्टी (नेकपा)का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’का बुहारीसमेत रहेकी मन्त्री मगर दाहाल निवास खुमलटारमा सगोलमा बस्दै आएकी छिन। मगरका पति नेकपाका युवा नेता प्रकाश दाहालको गत २०७४ मङ्सिर ३ गते हृदयाघातका कारण असामयिक निधन भएको थियो। त्यसबेला बीना प्रतिनिधिसभाका लागि कञ्चनपुर–१ बाट निर्वाचनमा होमिएकी थिइन्। शोकलाई शक्तिमा बदल्दै मतदातामाझ पुगेका मगरले संसद्मा जितेपछि पहिलो पटक मन्त्री भएकी हुन्। वर्तमान मन्त्रिपरिषद्मा उनी सम्भवतः कम उमेरकी सदस्य हुन्।

    मन्त्री बीनाभन्दा अगाडिका प्रकाशकी श्रीमती सिर्जना त्रिपाठीका छोरा प्रसिद्ध पनि खुमलटारमै बस्छन्। प्रसिद्ध अरुसँग भन्दा बीनासँग सुत्न मन पराउँने गरेको मन्त्रीको सचिवालयले जानकारी दिए। दुवै छोरा खेल्ने र सँगै बस्ने गर्दा हजुरआमा सीता दाहाललाई मन बुझाउने मेसो मिल्ने गर्छ। समय मिलेको बेलामा हजुरबा पनि नातिहरुसँग रमाउने गर्नुभएको उनको सचिवालयले जनाएको छ।

    दिवगङ्त प्रकाश दाहालको प्रथम वार्षिक स्मृतिका अवसरमा प्रकाशित स्मारिकामा बिनाले भावुक हुँदै पीडा व्यक्त गरिन्, 'अब त हाम्रो प्रेमको चिनो छोरा पनि ठूलो भयो, बुबा भन्न सक्छ। तिमीलाई थाहा छ, सिरानीको तस्वीर देखाउँदै ‘बाबुको बुबा’ भन्छ। अनि, तिम्रो तस्वीरलाई म्वाइँ खान्छ। तिम्रो प्यारो छोरा प्रणवले मलाई पटकपटक रुवाउँछ यसरी।'

सम्बन्धित समाचार

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४/९८४१३०४३९१ (प्रेम)
इमेल: ad@thahakhabar.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]